नेशनल मेडिकल कलेज शिक्षण अस्पताल विश्वमै ख्याति कमाएको नेपालको काठमाडौंमा रहेको त्रिभुवन विश्वविद्यालयसँग सम्वन्धन प्राप्त तथा नेपाल मेडिकल काउन्सिलद्वारा मान्यता प्राप्त अन्तर्राष्ट्रिय स्तरको मेडिकल कलेज हो । यस मेडिकल कलेज तथा शिक्षण अस्पतालले समग्र नेपालमा र विशेष गरी गाँउ गाँउमा आवश्यक स्वास्थ्य प्राविधिक जनशक्ति (दक्ष चिकित्सक तथा पारामेडिकल) देश भित्र नै उत्पादन गर्ने लक्ष लिएको छ । शिक्षण अस्पतालले सहुलियत दरमा गुणस्तरीय स्वास्थ्य सेवा उपलब्ध गराउने विश्वास लिएको छ। मानव संसाधनको बिकाश र दक्ष जनशक्ति उत्पादन नै यस मेडिकल कलेजको मुख्य लक्ष र उदेश्य हो ।

यो मेडिकल कलेज चिकित्सा शिक्षाका क्षेत्रमा स्थापित भएका अत्यन्त दक्ष तथा अनुभवि फ्याकल्टिहरुद्वारा अध्ययन, अनुसन्धान, ज्ञान र सिप सिकाएर मेडिकल र नर्सिङ विषयका शिक्षार्थीहरुको उर्वर बौद्धिक क्षमतालाई निखार्ने र देशभरका मेडिकल कलेजहरु मध्ये उच्च शैक्षिक स्थान हाँसिल गर्न प्रतिवद्ध छ । यस कलेजले आगामी दिनमा आफुलाई नेपाल र एशियाको मात्र नभएर समग्र विश्वकै उत्कृष्ट र अत्याधुनिक मेडिकल कलेजहरु मध्ये एक बनाउने सोच समेत राखेको छ ।

यस मेडिकल कलेजले यहाँ अध्ययनरत बिद्यार्थीहरुलाई चिकित्सा विज्ञानका पछिल्ला उपलब्धिहरुबारे पर्याप्त ज्ञान सिप र दक्षतासँगै तिनलाई सहि तरिकाले सफल रुपमा उपयोग गर्न समेत सिकाउँछ । यहाँका विद्यार्थीहरुको सिकाई संस्कारले उनीहरुलाई आफ्ना विरामीहरुप्रति व्यवसायिकता सँगै आत्मीयता, दयाभाव र सहानुभुतिको साथमा उपचार गर्न उत्प्रेरित गर्दछ जसले उनीहरुलाई दिन दुखी, अभाव र पिडामा रहेका विरामीको भगवानको रुपमा समेत स्थापित गर्न मद्दत गर्दछ ।

माथिका लक्ष तथा उद्देश्यहरुका साथमा, यो मेडिकल कलेज अन्तर्राष्ट्रिय स्तरमा चिकित्सा शिक्षा प्रदान गर्न ‘द वर्ल्ड फेडरेशन अफ मेडिकल एडुकेशन’ विश्व चिकित्सा शिक्षा महासंघले निर्दिष्ट गरेको र नेपाल, भारत र अन्य विकसित मुलुकका मेडिकल काउन्सिलले निर्धारण गरेको मापदण्ड अनुसार आवश्यक सम्पूर्ण पुर्वाधार सहित स्थापना भएको छ । देशको मुख्य र आफैमा विश्वभर सुपरिचित शैक्षिक संस्थान त्रिभुवन विश्वविद्यालय सँगको सम्वन्धनमा यस मेडिकलेजमा संचालित अन्डर ग्र्याजुएट र पोष्ट ग्र्याजुएट मेडिकल र नर्सिङ उपाधि संसारभर सम्मानपूर्वक स्वीकार्य रहेको छ । यहाँबाट उत्पादित चिकित्सा जनशक्ति चिकित्सा क्षेत्रमा संसारभर स्थापित हुन सक्ने क्षमता राख्छन र यहाँ सिकेका ज्ञान सिप र दक्षताले उनीहरुलाई संसारका जुनसुकै चिकित्सा क्षेत्रमा सफल बनाउने अपेक्षा हामीले राखेका छौं ।

नेशनल मेडिकल कलेज शिक्षण अस्पताल नेपालको आर्थिक राजधानी समेत भनेर चिनिएको वीरगञ्ज महानगरपालीकाको दक्षिण-पूर्बी भागमा नेपाल भारत सीमा नजिक अवस्थित छ । यस मेडिकल कलेज शिक्षण अस्पताल परिसर भारतको बिहार राज्यको पुरानो शहर रक्सौलबाट मात्र तीन किलोमिटरको दुरीमा रहेको छ । रक्सौल शहर भारतका मुख्य मुख्य शहरहरुसँग सडक सञ्जाल तथा रेल सञ्जालको माध्यमबाट राम्रोसँग जोडिएको छ । वीरगंज शहर नेपालका सबैजसो मुख्य शहरहरुसँग सुगम सडक सञ्जाल र हवाई सेवाका माध्यबाट जोडिएको छ । नेपालको राष्ट्रिय राजधानी काठमाडौंबाट वीरगञ्ज मात्र १५ मिनेटको उडान समयमा पुग्न सकिन्छ ।

यस मेडिकल कलेज शिक्षण अस्पतालको स्थापना अत्यन्त ब्यवस्थित तरिकाले आवश्यक सम्पूर्ण पूर्वाधारहरु तयार गरिसकेपछि गरिएको हो। यहाँ प्रि-क्लिनिकल तथा क्लिनिकल विभागहरु, शिक्षण अस्पताल, नर्सिङ स्कुल, पुस्तकालय, छात्रावास, फ्याकल्टि तथा अन्य कर्मचारीका लागि आवास लगायतका समपूर्ण सुविधाहरु उपलब्ध रहेका छन् । यि सम्पूर्ण सुविधाहरु एकै परिसर भित्र एक सय बिगाहा (४० एकर्स) मा फराकिलो बाटो सहित योजनावद्ध रुपमा स्थापित गरिएको छ । तुलनात्मक रुपमा यस मेडिकल कलेजको परिसर अन्य निजी मेडिकल कलेजहरुको भन्दा निकै फराकिलो रहेको छ, यसलाई पनि मेडिकल कलेजको एक विशेषताको रुपमा लिँदा अत्युक्ति हुँदैन । यो खुलापनले यस मेडिकल कलेज शिक्षण अस्पतालका फ्याकल्टिहरु चिकित्सा शास्त्र अध्ययन गर्ने बिद्यार्थीहरु तथा यहाँ कार्यरत कर्मचारीहरुलाई एक अर्कालाई राम्रोसँग जान्ने बुझ्ने अवसर प्रदान गरी र उचित ढङ्गबाट शिक्षण तथा सिकाईका गतिविधि संचालन गर्न सक्छन् ।

नेशनल मेडिकल कलेज शिक्षण अस्पताल वीरगंज शहरको बाहिरी बृत्तमा रहेकाले शान्त वातावरण तथा प्रदुषणबाट समेका त मुक्त रहेको छ । शहर र मेडिकल कलेज आवागमनका लागि सातैदिन अनि चौविसै घण्टा यातायातको सुविधा उपलब्ध रहेको छ ।

वीरगंज शहर बहु साँस्कृतिक तथा बहुभाषिक शहर हो जहाँ हिन्दू, मुस्लिम, बुद्धिष्ट, शिख, इसाई तथा अन्य धर्मावलम्बीहरु सहिष्णुता पूर्वक मिलेर बसेका छन् । यहाँको मुख्य भाषा भोजपुरी भएपनि अधिकांशले नेपाली भाषा बोल्दछन भने हिन्दि, उर्दू, अंग्रेजी र नेवारीसँगै स्थानीय भाषा बोल्नेहरुपनि उत्तिकै छन् ।

यहाँको मौसम तुलनात्मक रुपमा बढी गर्मी हुने मौसम हो । बीरगञ्जमा जाडोमा न्यूनतम तापमान ८ डिग्री सेल्सियस सम्म चिसो हुन्छ भने गर्मीमा अधिकतम तापमान ३९ डिग्री सेल्सियस सम्म हुन्छ । त्यसैगरी वर्षाको कुरा गर्दा यहाँ वर्षातको मौसममा ८० मिलिमिटर सम्म पानी पर्ने गरेको छ । बीरगञ्ज नेपालको दोश्रो ठुलो शहर हो । जनसंख्याको कुरागर्दा यहाँ ६ लाख बढि मानिसहरुको बसोवास रहेको छ । औद्योगिक र ब्यापारिक नगरको रुपमा परिचित यस शहरमा धेरै होटल र रेस्टुरेन्टहरु संचालनमा रहेका छन् । मानिसको क्षमता अनुसार किनमेल गर्न सकिने ठुला साना थुप्रै बजार र किनमेल केन्द्रहरु पनि रहेका छन् । साथमा मनोरञ्जन तथा पुनर्ताजगिका लागि समेत सिनेमाहल लगायतका रिक्रियशन सेन्टरहरु समेत शहर वरपर नै उपलब्ध रहेका छन् ।

धर्मकर्म र पुजापाठ गर्नका लागि यहाँ धेरै जसाे हिन्दू मन्दिर, बौद्ध गुम्बा, मस्जिद, गुरुद्वारा तथा चर्चहरु रहेका छन् । जसले मानिसको धार्मिक तथा आध्यात्मिक इच्छा तथा आकांक्षाहरुलाई पुरा गर्न मद्दत गर्दछन् ।

यस बीरगञ्ज शहरमा नेपालका सबैजसो बैंकहरुका शाखा कार्यालयहरु संचालनमा रहेका छन् । निजीस्तरमा संचालित अधिकांश बैंकहरु भारतीय बैंकहरुसँगको सहकार्यमा सञ्चालित छन भने केही सार्कका अन्य मुलुकका अन्य सदस्य राष्ट्रहरुसँगको सहकार्यमा सञ्चालित छन् । जसले गर्दा यस नेशनल मेडिकल कलेज अस्पतालमा भारत तथा अन्य सार्क सदस्य मुलुकहरुबाट अध्ययनकालागि आउने विद्यार्थीहरुलाई आर्थिक कारोवारका लागि सहज हुने गरेको छ । नेपालको ठुला बैंकहरु मध्येको एक बैंकको शाखा कार्यालय यस नेशनल मेडिकल कलेज शिक्षण अस्पताल परिसर भित्र नै संचालनमा रहेको छ, जहाँ २४ सै घण्टा एटिएमबाट रकम झिक्न सकिने ब्यवस्था समेत छ । यस अस्पतालका फ्याकल्टि, विद्यार्थी, कर्मचारी तथा बिरामी र बिरामीका आफन्तजनहरूलाई समेत पैसा निकाल्न सहज हुने गरेको छ ।